A Biblioteca Municipal do Porriño busca consolidarse como un espazo de encontro veciñal e para afeccionados ao coleccionismo. Por iso, a partir do xoves 3 de setembro, organizará encontros de intercambio de cromos todos os xoves, en horario de 18:00 a 19:00 horas.
Esta iniciativa, que coincide co inicio da tempada futbolística, prevé que os cromos de fútbol sexan protagonistas nas primeiras xuntanzas, tanto por novas coleccións como por álbums incompletos. Non obstante, a actividade está aberta a todo tipo de cromos, incluíndo Pokémon, Marvel ou de debuxos infantís.
O obxectivo é proporcionar un espazo onde nenos, mozos e adultos poidan compartir a súa afección, coñecer outros coleccionistas e intercambiar cromos repetidos por aqueles que lles faltan, nun ambiente distendido e amigable.
“"Queremos que a Biblioteca Municipal sexa un espazo vivo e aberto a todo tipo de actividades e intereses da veciñanza. Unha iniciativa tan sinxela como intercambiar cromos pode converterse nunha estupenda oportunidade para relacionarse e facer da biblioteca un novo punto de encontro."
As quedadas comezarán o vindeiro xoves 3 de setembro e celebraranse todos os xoves do ano, mantendo o horario de 18:00 a 19:00 horas. A participación basearase exclusivamente no intercambio de cromos, prohibíndose a compra ou venda. Pídese que os menores estean tutelados.
