A institución galega estará representada pola súa directora-xerente, Rosa Chapela Pérez, nesta rede que busca fortalecer a colaboración entre a ciencia, a innovación, as administracións públicas e o sector pesqueiro e da acuicultura.
O obxectivo da REECEA é avanzar cara a un modelo de economía azul máis sostible, competitivo e equitativo, transformando os desafíos do sector mariño en oportunidades de crecemento e desenvolvemento sostible.
Na xuntanza, os membros exploraron novas vías de cooperación, xeración de sinerxías e propuxeron novas actuacións, proxectos e liñas de traballo conxuntas, ademais de informar sobre as incorporacións de novas entidades.
A REECEA, constituída en agosto de 2025, integra entidades recoñecidas pola Secretaría Xeral de Pesca pola súa especialización e capacidade de innovación, que actúan como centros de coñecemento nos seus ámbitos e contribúen ao fortalecemento da rede.
A rede encárgase de identificar actores clave, integrar coñecemento científico e sectorial, organizar actividades de divulgación e capacitación, asesorar en temas de pesca e acuicultura e avaliar o seu impacto.
Coa participación hoxe, CETMAR ratifica a súa adhesión a unha entidade cos seus mesmos obxectivos: promover a cooperación, fomentar o intercambio de coñecemento, impulsar a sostibilidade e desenvolver proxectos innovadores.
