O obxectivo principal do programa é avanzar cara a un modelo onde os residuos xerados pola industria téxtil se transformen en novos recursos e materias primas. Para acadar esta meta, o proxecto fomentará a colaboración entre o sector público e o privado, desenvolvendo solucións prácticas para mellorar os sistemas actuais de recollida, clasificación, reutilización e reciclaxe de produtos téxtiles.
A iniciativa articularase a través de grupos de traballo compostos por administracións públicas e empresas privadas. Estes equipos identificarán problemas, detectarán oportunidades e deseñarán proxectos piloto para unha xestión máis eficiente e sostible dos residuos, trasladando as necesidades reais do territorio a propostas concretas de innovación.
A participación de Arteixo permitirá experimentar con solucións adaptadas ás características do seu tecido empresarial e industrial, considerado unha das máis importantes de Europa no sector téxtil. O municipio buscará explorar novas oportunidades de innovación, cooperación e aproveitamento de recursos.
O proxecto abarcará todas as fases do ciclo de vida dos produtos téxtiles, incluíndo a mellora dos sistemas de recollida e clasificación, o fomento da reutilización e reparación de prendas, e o desenvolvemento de novas alternativas para a reciclaxe. A colaboración entre todos os axentes implicados será fundamental.
