A localidade de Celanova, na provincia de Ourense, é desde este luns e ata o vindeiro venres o epicentro da actividade audiovisual galega coa celebración dunha nova edición do XXII Curso de Medios Audiovisuais de Celanova (Cemac). A iniciativa, que conta con 44 persoas inscritas, reúne a profesionais do sector e a alumnado universitario co obxectivo de analizar a diversidade creativa actual no ámbito cinematográfico, principalmente galego.
Organizado pola Fundación Carlos Casares dentro da oferta formativa de extensión universitaria do campus de Ourense, o Cemac conta co apoio da Deputación de Ourense e da Xunta de Galicia, a través da Axencia Galega das Industrias Culturais.
Ao longo das cinco sesións previstas, que teñen lugar principalmente no Auditorio Ilduara, abordaranse producións como Así chegou a noite, Leo&Lou, Punto Nemo, Bispos, Alucinema e Pura, da man de membros dos seus equipos. Tamén se analizarán os diversos formatos, o proceso de consolidación do ecosistema audiovisual, o seu equilibrio industrial e creativo, e as novas posibilidades de actuación. Entre os perfís seleccionados atópanse profesionais da interpretación, produción, guión, dirección, distribución e comunicación, como Felipe Pizarrán, Raquel Meleiro, Alba Gallego, Rocío Casal, Carlos Solano, Lois Patiño, Milo Baños e Julia Sánchez. Na xornada de clausura intervirá Álvaro Agustín, director xeral de Telecinco Cinema.
A primeira sesión, celebrada este luns pola tarde, estivo dedicada ás curtas e webserie, afondando no traballo creativo de Alba Gallego e Alucinema, da curta Bispos, de Zahira Teijelo, e da curta de non-ficción Pura, de Carmen Méndez. O director do curso e profesor da UVigo, Paulino Pérez, sinalou que foi "un día caloroso e intenso de actividade no que se demostrou que as curtas tamén son cine". Hoxe, a segunda sesión arrancou co visionado de Así chegou a noite, de Ángel Santos, coa presenza de Tamara Soto, Lorena Vilas, Pablo Cayuela e Milo Baños.
O curso tamén inclúe actividades complementarias. Este luns presentouse o libro Viaje cinematográfico por Galicia. Una retrospectiva emocional (1896-1939), a cargo de Emilio C. García. Mañá martes, ás 19.15 horas no claustro do mosteiro, inaugurarase a exposición Carlos Casares e a fotografía. Na noite do xoves 9 celebrarase un concerto do Hércules Brass e Falling.
En paralelo, desenvolverase o 16º Taller Celanova, Plató de Ficción, dirixido polo profesor Paulino Pérez. Esta experiencia práctica busca a produción dunha peza audiovisual cun orzamento pechado. O venres presentarase Entre acto, a curta desenvolvida na edición do pasado ano.
A Fundación Carlos Casares organiza este curso cada verán desde 2024, reunindo profesionais e matriculados para analizar o seu labor. Ao longo destes anos, pasaron polo curso máis de 1000 inscritos e máis de 400 profesionais do audiovisual.
