A Universidade de Vigo terá unha destacada representación na fase final da segunda edición do programa Líderes Dixitais Universitarios. Un total de catro estudantes, tres da Escola de Enxeñaría Informática e un da EE de Minas e Enerxía, acadaron esta etapa final da iniciativa impulsada por Telefónica España a través da súa Rede de Cátedras.
A fase decisiva do programa celebrarase os días 29 e 30 de outubro de 2026 nas instalacións de Telefónica en Madrid. Os seleccionados da UVigo son Pablo Alonso, estudante de Enxeñaría dos Recursos Mineiros e Enerxéticos; Alberto Nóvoa, do mestrado en Enxeñaría Informática; e Darío López e Sami Darwich Alkharat, ambos do dobre grao en Intelixencia Artificial e Enxeñaría.
A reitora, Carmen García Mateo, felicitou aos estudantes pola súa clasificación, destacando a importancia da colaboración coa Rede de Cátedras Telefónica. Na xuntanza tamén estiveron presentes o director da Cátedra Telefónica da UVigo, Jose Cidrás; o profesor coordinador do programa, Javier Rodeiro; o director Territorial de Telefónica, Manuel Ángel Alonso; a xefa de RRII e Innovación Territorial Telefónica, Ana Flores; e a responsable de RRII e Innovación T. Norte, Esther Durán.
Tanto os docentes da UVigo como os representantes de Telefónica subliñaron o alto nivel de preparación e motivación do alumnado das escolas de enxeñaría da universidade viguesa. "Tecnoloxicamente a Universidade de Vigo está moi preparada e ten unhas titulacións moi potentes que nos permiten competir con calquera de Galicia e de fóra de Galicia", afirmou Javier Rodeiro.
O programa Líderes Dixitais, que celebra o 25 aniversario da Rede de Cátedras Telefónica, selecciona estudantes de grao e mestrado das 23 institucións académicas que forman parte desta rede. A avaliación dos participantes tivo en conta competencias dixitais avanzadas, habilidades de liderado e comunicación, e coñecemento do ámbito empresarial.
Na xornada final, os preto dun cento de participantes competirán individualmente ante un xurado cualificado, enfrontándose a retos que porán a proba o conxunto das súas capacidades. Repartiranse sete galardóns por un total de 11.500 euros, sumando 23.000 euros en premios nesta edición.
O tema central da competición será o impacto da intelixencia artificial na competitividade das contornas urbanas, coa pregunta: "unha smart city sen IA seguirá sendo competitiva nos próximos anos?"
A Rede de Cátedras Telefónica, con máis de 25 anos de traxectoria, é un instrumento clave para fomentar a formación, investigación e transferencia de coñecemento tecnolóxico, fortalecendo a colaboración entre universidade, empresa e institucións públicas. A Universidade de Vigo é membro desta rede desde 2013.
