O programa, que combina charlas, actividades didácticas e obradoiros, ten como obxectivo principal achegar os valores e a riqueza dos catro arquipélagos que conforman o Parque Nacional marítimo-terrestre das Illas Atlánticas: Cíes, Ons, Sálvora e Cortegada, ademais de concienciar o alumnado na súa conservación.
Esta iniciativa está aberta á participación de colexios de Educación Infantil, Primaria, Secundaria, Bacharelato e Formación Profesional. As actividades desenvolvéronse tanto no Centro de Visitantes do parque en Vigo como nos propios colexios, segundo a solicitude dos centros.
Ademais, un total de 8 colexios de Infantil e Primaria, 14 aulas e 220 estudantes participaron no concurso final 'O Parque Nacional coa Escola', presentando traballos creativos sobre os valores naturais e culturais dos arquipélagos.
Todos os colexios foron considerados gañadores e, como premio, foron invitados a visitar recentemente Cíes ou Ons, onde puideron facer unha ruta interpretativa da man dos guías oficiais do parque.
Como recoñecemento ao seu esforzo, o alumnado recibiu un diploma para o centro e un kit composto por mochila, camiseta e porta-bocadillos. Dende a posta en marcha da iniciativa no ano 2012, participan de media 45 centros e uns 2.000 alumnos por curso, sumando preto de 26.000 escolares participantes ata o momento.
