O alcalde de Vigo, Abel Caballero, anunciou este venres que a autora viguesa "merece memoria eterna", polo que a praza pública que conectará a peonil do Calvario con San Roque levará o seu nome.

Caballero participou na inauguración da exposición 'Begoña Caamaño no Calvario vigués', unha mostra composta por seis paneis con ilustracións, fotografías antigas e textos do libro 'A meniña que perdeu un zapato na lama' de Ramón Nicolás, editado por Galaxia. Neste libro, o autor recupera a infancia da homenaxeada.

A exposición, situada na propia peonil do Calvario, conta co arquivo fotográfico da asociación de veciños do barrio, o Arquivo Begoña Caamaño e o Arquivo da Editorial Galaxia. A mostra invita a percorrer a memoria privada e colectiva da escritora a través dos lugares, lecturas e experiencias que definiron a súa relación co barrio.

Fotografías históricas, documentos e ilustracións axudan a reconstruír o Vigo da segunda metade do século XX que ela coñeceu de nena. O alcalde referiuse a Caamaño como "unha muller extraordinaria e cunha capacidade literaria fantástica".

A nova praza, situada entre a rúa Urzáiz e a rúa San Roque, será "fermosísima" e busca que a figura de Caamaño "permaneza na memoria para sempre", segundo o rexedor vigués.

O director de Galaxia, Xosé Manuel Soutullo, explicou que a exposición busca achegar a figura de Begoña Caamaño aos veciños do Calvario, o seu espazo vital ata os doce anos. Ramón Nicolás tamén trasladou a súa ilusión pola homenaxe e a colaboración do alumnado do IES Castelao.

A irmá da homenaxeada, Beatriz Caamaño, destacou a importancia de que as novas xeracións coñezan a figura e a obra de Begoña Caamaño e puxo en valor o traballo realizado para a exposición e o libro.

O pasado marzo, o BNG solicitou ao Concello que a homenaxeada polas Letras Galegas dese nome a unha praza no barrio, unha petición que agora se materializa.