A mostra, que conta coa colaboración do Concello de Poio e da Deputación de Pontevedra, celebrarase todos os sábados ás 21:00 horas no local da Comunidade de Montes de San Xoán. A programación inclúe a participación das compañías Migallas Teatro, Enredos Teatro, Anómico Teatro e a propia Moura Teatro.
O ciclo escénico ofrece unha variada proposta de calidade pensada para todos os públicos. O prezo do abono completo para as catro funcións é de 15 euros, mentres que as entradas individuais terán un custo de 5 euros.
Na presentación do ciclo, o alcalde Ángel Moldes e a concelleira de Cultura, Natalia Sabarís, destacaron a importancia destas iniciativas para fomentar a afección polo teatro no municipio.
“"Falemos como galegas” é a proposta de Migallas Teatro, que subirán ao escenario este domingo, día 3, para estrear o ciclo. É un espectáculo humorístico interactiva onde se abordan moitas cuestións relativas á lingua galega a través de sketchs e cancións cómicas de autor."
O sábado 10 de outubro será a quenda de Enredos Teatro coa comedia “As ladroas somos xente honrada”. Posteriormente, o sábado 17, Anómico Teatro presentará “Anxos abandonados en mosaicos despois do combate”, unha crítica contra a guerra e a inxustiza global.
Finalmente, o sábado 24, Moura Teatro porá en escena “Touporroutou da Lúa e do Sol”, unha adaptación dunha peza de Roberto Vidal Bodaño sobre unha compañía de cómicos ambulantes.
