A localidade de Baiona foi escenario da cerimonia de entrega das primeiras Medallas ao Mérito do Camiño Portugués da Costa. Os galardoados foron a Xunta de Galicia, a nivel institucional, e Juan Manuel López-Chaves, a título póstumo, en recoñecemento á súa decisiva contribución para que esta ruta fose declarada oficial hai unha década.
A entrega do premio a López-Chaves, recolleito polo seu fillo, tivo un momento de especial emotividade. O Alcalde de Baiona, Jesús Vázquez Almuiña, destacou a figura do homenaxeado como "fundador de Amigos dos Pazos e figura absolutamente pioneira sen a cal o resurdimento desta ruta non sería posible". Almuiña lembrou a "intensa e tenaz campaña de investigación e divulgación" iniciada por López-Chaves en 1992 para "demostrar a autenticidade histórica do itinerario litoral fronte a todas as resistencias", subliñando que "consagrou a súa vida á defensa do patrimonio e ao recoñecemento dos camiños portugueses". Baiona "rinde un homenaxe de profunda gratitude e xustiza histórica a quen puxo a primeira semente para devolver á vila o seu lugar privilexiado na historia do fenómeno xacobeo".
O Presidente da Xunta de Galicia, Alfonso Rueda Valenzuela, recolleu o galardón que recoñece o papel fundamental da administración autonómica na oficialización do Camiño Portugués da Costa. O alcalde baionés sinalou que a decisión de oficializar o itinerario en 2016, cun investimento posterior de máis de 5 millóns de euros en sinalización e infraestruturas, permitiu unha "proxección internacional" e un "crecemento histórico".
Segundo os datos proporcionados, o número de peregrinos pasou de 2.600 en 2016 a preto de 90.000 en 2025, convertendo a Baiona nun "elemento clave na desestacionalización do turismo e na revitalización económica e cultural do litoral sur de Pontevedra". O rexedor tamén agradeceu o traballo de concellos, asociacións e expertos, e reivindicou a ruta como "un bo exemplo da Galicia Calidade" e fundamental para o Xacobeo 2027, destacando que o 80% dos seus peregrinos son internacionais.
A oficialización do Camiño en 2016 contribuíu a un modelo turístico "máis sostible e menos dependente dos meses centrais do verán". A ocupación hoteleira en Baiona experimentou un notable incremento fóra da tempada alta: en setembro pasou do 38% en 2015 ao 74% en 2025, e en outubro, do 28% ao 63%. Esta desestacionalización "repercute directamente na economía da vila", mantendo a actividade e o emprego durante máis meses.
O alcalde concluíu que o recoñecemento á Xunta de Galicia "non é unicamente a oficialización dun itinerario", senón "unha decisión que permitiu abrir unha nova etapa para Baiona", diversificando o turismo cara a un modelo "sostible, desestacionalizado, respectuoso co territorio e capaz de converter o paso dos peregrinos en oportunidades para a nosa economía e para a nosa veciñanza".
