A chegada de Moldes Menduiña á investigación produciuse ao final da súa licenciatura, cando descubriu unha forma de traballar que espertou a súa curiosidade e acabou definindo a súa carreira profesional. Inicialmente, non tiña claro dedicarse á investigación, pero o profesor Juan Carlos Parajó Liñares animouna a considerar esta saída profesional, depositando unha confianza que a axudou a dar o paso.
Un dos retos dos seus primeiros anos foi construír unha traxectoria en Enxeñaría Química a partir dunha formación inicial en Tecnoloxía de Alimentos. Hoxe, como catedrática, considera que a súa experiencia pode servir de referencia a quen comezan unha tese nunha área diferente á da súa titulación, afirmando que "Cambiar de área non ten por que ser unha limitación; pode ser incluso unha vantaxe".
Ana Moldes codirixe, xunto co catedrático José Manuel Cruz, o grupo de investigación EQ10. Este grupo traballa en dúas liñas principais: a produción de biosurfactantes a partir de correntes e subprodutos industriais, e a obtención de novos antibióticos baseados en análogos de gramicidina. Combinan biotecnoloxía, enxeñaría ambiental e sustentabilidade para desenvolver formulacións máis biocompatibles con aplicacións cosméticas, farmacéuticas e agroquímicas.
As súas estancias de investigación no estranxeiro tamén marcaron a súa traxectoria, incluíndo unha experiencia hai case trinta anos nun centro de referencia do Departamento de Agricultura de Estados Unidos (USDA), que lle permitiu comprobar que a investigación española estaba ao nivel de centros internacionais de prestixio.
Sobre o tempo para investigar, Moldes considera que a curiosidade e o entusiasmo son parte do traballo científico, aínda que recoñece a dificultade para desconectar. Destaca a importancia de organizar o tempo con flexibilidade e contar co apoio do seu equipo, marido e familia. Afirma non sentir que ser muller limitase as súas oportunidades profesionais na Enxeñaría Química, aínda que recoñece que outras persoas poden vivir situacións diferentes.
A súa principal preocupación sobre o futuro da profesión investigadora céntrase na acumulación de responsabilidades, que poden restar tempo á investigación pura. "Deberiamos recuperar as raíces do que significa investigar", sostén, reivindicando tempo para pensar, experimentar e revisar hipóteses con rigor científico. Recomenda a quen queira iniciar unha carreira científica "coñecer ben a profesión antes de decidirse e ter curiosidade, ganas de aprender e disposición para saír da zona de confort", ademais de "a importancia de traballar en equipo".
