A secretaria xeral técnica da Consellería do Mar, Marta Barreiro, e a directora-xerente de CETMAR, Rosa Chapela, participaron en Barcelona na xornada europea 'O impulso da economía azul en Europa: estratexias e resultados', celebrada no Parque de Investigación Biomédica.
Durante o foro, Barreiro detallou as liñas mestras da Estratexia de Economía Azul de Galicia 2024-2027. Este instrumento transversal conta con máis de 114 millóns de euros e 40 accións estratéxicas, involucrando a 20 entidades para avanzar cara a un modelo de crecemento marítimo baseado na sustentabilidade ambiental, a protección da biodiversidade e a innovación tecnolóxica.
A representante autonómica salientou que Galicia xa conta cunha realidade marítima consolidada que inclúe pesca, marisqueo, acuicultura, industria, loxística portuaria, turismo e patrimonio costeiro. Subliñou que 'o verdadeiro reto da economía azul non consiste en engadir novas actividades sen máis, senón en conectar mellor o tecido que xa temos, facelo máis sostible e competitivo e preparalo para o futuro'.
A estratexia está canalizada a través dun Consello Rector multidepartamental e dunha Oficina Técnica xestionada polo Centro Tecnolóxico do Mar (CETMAR). Ademais, destacou a importancia de que a planificación chegue ás vilas costeiras mediante instrumentos como o Plan de Cultura Marítima de Galicia Horizonte 2030 e o papel dos Grupos de Acción Local do Sector Pesqueiro (GALP), que xa mobilizaron 322 proxectos cun investimento superior a 45 millóns de euros.
Pola súa banda, Rosa Chapela abordou o impacto territorial e o valor da economía azul en Galicia. Máis alá do PIB e da produción directa, destacou a importancia de cuantificar o valor xerado no territorio, a resiliencia, a interconexión de actividades e o impacto indirecto ou inducido.
Ante a falta de indicadores específicos, Chapela expuxo metodoloxías de seguimento que a Consellería do Mar está a implementar a través do impacto territorial e socioeconómico dos proxectos dos GALP, as táboas de entrada-saída da pesca e a industria conserveira, e a valoración económica de sectores mariños mediante o MARPLAN.
