O certame, organizado pola Federación Empresarial Provincial de Turismo e Hostalaría de Pontevedra (Feprotur) co patrocinio do Concello de Vigo, presenta un total de 22 tapas elaboradas por 19 establecementos locais. Delas, 18 son salgadas e catro doces, todas dispoñibles a un prezo de 4 euros.

A avaliación das tapas realízase en dúas fases. Inicialmente, unha votación popular permite aos comensais elixir as súas favoritas, mentres que un xurado profesional visita os locais de forma anónima para realizar unha valoración técnica.

Os oito establecementos con mellor puntuación avanzarán á gran final, onde terán que preparar as súas propostas en directo ante un xurado experto. Nesta última etapa decidirase a "Mellor Tapa 2026", ademais doutros recoñecementos como a tapa máis popular, a mellor maridaxe, a mellor tapa con produtos do mar ou a máis creativa.

Entre os locais participantes atópanse recoñecidos establecementos da cidade como As Cunchas, Attica21, Baruta Burguer & Kitchen, Bendito Nopal, Costera MX, La Revoltosa, NH Collection, Rooftop Hotel Maroa ou La Villa Bouzas, entre outros. O evento conta co apoio de patrocinadores como Estrella Galicia, Vigo Convention Bureau, Cabreiróá ou Altos de Torona.