Esta nova infraestrutura, parte do Vigo Quantum Communication Center (VQCC), está deseñada para decodificar sinais mediante un receptor cuántico, un prototipo desenvolvido polos propios investigadores do centro. A súa capacidade convértea na estación terrestre máis grande do país dedicada a este tipo de comunicacións, e espérase que se integre en futuras redes de comunicación cuántica a nivel nacional e internacional como un nodo satelital.

Durante o acto de presentación, celebrado o xoves, participaron destacadas figuras como o reitor Manuel Reigosa, o conselleiro de Educación Román Rodríguez, e o director do VQCC, Marcos Curty. Este último estivo acompañado por unha vintena de investigadores, quen realizaron unha demostración do funcionamento da tecnoloxía cun telescopio a pequena escala.

A estación está estratéxicamente situada na parte máis alta do campus, xunto ao aparcadoiro traseiro de Filoloxía, garantindo un ceo despexado para apuntar aos satélites. Aínda que algunhas partes están pendentes de montaxe, Curty indicou que agardan comezar a utilizala a finais deste ano, coincidindo coa posta en órbita do satélite EAGLE-1 da Axencia Espacial Europea (ESA). Tamén se contempla a posibilidade de probala con satélites de comunicacións convencionais.