A iniciativa, impulsada pola Unidade de Cultura Científica e da Innovación (UCC+i) da UVigo, busca achegar o saber académico á cidadanía nun formato próximo. O proxecto, enmarcado no plan Ciencia de Ida e Volta e financiado pola Fundación Española para la Ciencia y la Tecnología (FECYT), conta coa mentoría de persoal investigador da institución académica.
O ciclo comeza este xoves en Pontevedra e continuará o 19 de xuño no Vitruvia Café de Vigo. Nesta sesión viguesa, un estudante do programa relatará o proceso de construción artesanal dunha zanfona, combinando a súa formación na Escola Municipal de Artes e Oficios de Vigo coa experiencia adquirida na universidade.
A programación estenderase tamén a Ourense antes de pecharse o 26 de xuño cun acto de recoñecemento no edificio Redeiras, en Vigo. Este encontro final servirá para poñer en valor o labor divulgativo realizado polo alumnado e o profesorado mentor ao longo das distintas edicións desta proposta.
