A edición máis recente da Ultreia marcou un fito ao incrementar a súa asistencia nun 16% respecto ao ano anterior, demostrando o seu enorme potencial. Os participantes enfrontáronse a un traxecto de 52 quilómetros, caracterizado polo esforzo e o compañeirismo, co obxectivo de seguir superando metas.

Ao longo do percorrido, a organización asegurou unha experiencia enriquecedora, reforzando a animación en diversos puntos e proporcionando avituallamentos con comida e bebida para os máis de 800 camiñantes. Dous momentos destacaron especialmente: a recepción na capela de Santa Marta, onde as damas e galáns do Entroido de Cobres, da Asociación Cultural Cobres, ofreceron unha colorida benvida, e a actuación da Banda de Guerra da Brilat na praza Antonio Palacios de O Porriño, que animou o paso dos peregrinos.

Aínda que a Ultreia non ten un carácter competitivo, algúns deportistas puxeron a proba a súa resistencia. Aitor Montero, quen xa destacara en 2024, foi o primeiro en cruzar a meta en Pontevedra, completando os 52 quilómetros en 4 horas e 36 minutos. Tras el, 485 participantes máis chegaron á Boa Vila despois de partir de Tui arredor das 9:00 da mañá.

O éxito do evento foi posible grazas ao sólido respaldo institucional e empresarial. Entre os patrocinadores destacaron o Concello de Pontevedra, a Xunta de Galicia, a Deputación, o Concello de Tui, Veolia e Supermercados Froiz. Tamén colaboraron entidades como a Escuela Parasanitaria, Coca-Cola, Estrella Galicia, o Hotel Virgen del Camino, os concellos de O Porriño e Vilaboa, Almacén de Frutas e Renault Caetano Fórmula.

A organización subliñou a labor indispensable dos voluntarios HQR! e o apoio da Protección Civil de Tui, O Porriño e Redondela, así como da Policía Local de O Porriño. O Club Ciclista Triatlón Rías Baixas encargouse da asistencia técnica e o Hostel GBC cedeu as súas instalacións, contribuíndo ao bo desenvolvemento da xornada.