Durante as prospeccións arqueolóxicas previas á humanización da rúa Laxe, o Concello de Vigo descubriu novos vestixios da antiga muralla defensiva da cidade. O alcalde, Abel Caballero, confirmou que estes achados non suporán a paralización dos traballos e que se está a buscar unha solución para conservalos e facelos visibles unha vez rematada a reforma da vía.
Os restos foron atopados no cruzamento coa Travesía do Cónsul. Segundo explicou o rexedor, trátase dun segmento da muralla duns dous metros de lonxitude e 80 centímetros de ancho, cunha orientación norte-sur. Este tramo tería continuidade baixo a beirarrúa en dirección á rúa Carral. Non é a primeira vez que aparecen vestixios da muralla nesta área, xa que en intervencións anteriores se documentaran restos que estiveron visibles temporalmente a través dunha cristaleira, posteriormente cuberta polo seu deterioro.
Os técnicos indican que este segmento formaría parte da mesma estrutura que xa se conserva na ventá arqueolóxica situada ao final da rúa Carral, a uns 18 metros de distancia. A súa dirección sería cara ao sur, en dirección ao baluarte de Gamboa, un dos accesos históricos ao recinto amurallado da cidade.
“"Non podemos renunciar a unha parte tan importante da nosa historia."
O Concello comprométese a protexer os restos sen deter a intervención prevista. Caballero subliñou a importancia de integrar estes elementos no espazo urbano e deixalos á vista. A rúa Laxe permanecerá pechada aproximadamente un mes mentres se realizan as catas arqueolóxicas. Esta actuación enmárcase nun proxecto máis amplo que inclúe a humanización da vía e a reforma dos locais municipais da rúa Carral, cun orzamento de 935.000 euros, e que contempla a renovación integral das fachadas dos baixos comerciais para unificar a súa imaxe.
