Segundo explicou Sánchez, os informes da Intervención provincial conclúen que unha achega económica da Deputación a unha actuación incluída dentro dunha concesión municipal, como é o caso da xestión da auga por parte de Aqualia, non sería viable xuridicamente. Isto supón que a institución provincial non poderá participar economicamente nesta fase do proxecto, a pesar de que a obra é imprescindible para a futura ampliación do estadio e para cumprir coas esixencias da candidatura de Vigo ao Mundial de 2030.
A única posibilidade para que a Deputación puidese incorporarse ao financiamento pasaría por abrir un contrato independente para executar a actuación. Non obstante, Sánchez recoñeceu que esta alternativa podería atrasar uns prazos xa axustados, o que complicaría a adecuación do estadio para o campionato mundial.
Esta controversia xorde semanas despois de que a propia vicepresidenta xa cuestionase publicamente a fórmula elixida polo Concello. O pasado 23 de abril, o alcalde de Vigo, Abel Caballero, anunciou un investimento de 2,8 millóns de euros para retranquear os colectores de saneamento, unha intervención considerada clave para a reforma do estadio. Un día despois, Luisa Sánchez xa pedía explicacións sobre quen asumiría o custo da obra, alertando de que podería desprazar outras inversións no saneamento da cidade ou que os veciños puidesen acabar asumindo indirectamente o custo a través do recibo da auga.
Os traballos previstos consisten en desprazar dous grandes colectores paralelos vinculados á contorna do río Lagares e da avenida de Fragoso. A actuación contempla un investimento de 2.821.000 euros e un prazo estimado de execución de 14 meses.
Unha vez finalizados estes traballos previos, o seguinte paso será acometer a transformación da bancada de Tribuna para incrementar a capacidade do estadio ata os 43.000 espectadores esixidos pola FIFA. A financiación desta futura ampliación segue sendo un dos principais puntos pendentes, co alcalde Caballero defendendo que tanto a Xunta como a Deputación deberían asumir un terzo do custo cada unha.
