O sindicato CIG censurou a xestión "nefasta, errática e neglixente" que a Xunta de Galicia está a realizar na prevención e extinción de lumes forestais. Segundo a central sindical, unha "gran parte" dos contratos previstos para a xestión da biomasa nas franxas secundarias do exercicio de 2025 permanecen sen executar, deixando desprotexidas as parroquias con maior risco.

A organización sindical sinala que a "improvisación" da Consellería de Medio Rural é evidente no novo Convenio de xestión da biomasa asinado coa Fegamp e Seaga. A CIG lembrou que a finalización do convenio anterior paralizou os trámites e provocou o despedimento de persoal especializado, mentres que o novo acordo, publicado no DOG o 31 de maio de 2025, non permitiu iniciar os traballos antes do período crítico de incendios debido aos prazos administrativos.

"Chegamos a agosto de 2025 sen executar ningunha retirada de biomasa nas parroquias máis expostas", criticaron dende o sindicato, vinculando esta falta de prevención coas elevadas cifras de superficie queimada ese ano, que segundo distintas fontes oficiais oscilaron entre as 119.000 e as 171.000 hectáreas. Ademais, a CIG reprobou a contratación de 42 brigadas de reforzo a través de Seaga tras cinco anos sen esta encomenda, denunciando un recorte no seu período de actividade de seis a tres meses.

En relación co gran incendio de Oímbra, que o verán pasado arrasou 30.000 hectáreas e causou feridas graves a tres bombeiros, a CIG subliñou que a investigación apunta a que o lume puido iniciarse por labores de rozado con maquinaria en plena onda de calor, un traballo contratado por Seaga e xestionado polo concello. O sindicato enfatizou que "alguén deu esa orde de rozar" a pesar do risco extremo, cualificando o suceso como resultado dun sistema de loita contra o lume "atomizado" que non recoñece a profesionalidade do persoal e carece de planificación técnica.