O festival SilFest Valdeorras, que se celebra no Barco de Valdeorras, alcanza este ano a súa décima edición. O evento propón unha experiencia integral que vai máis aló da música, integrando a beleza natural da contorna, a oferta gastronómica local e propostas de lecer para todas as idades.
A programación musical desta edición complétase coas confirmacións de La Gloria, Mazu, Zabriskie, Adrian Timms (cun concerto Vibra Mahou) e Os Parrandas, engadindo diversidade de estilos á xa anunciada lista de artistas. Nomes como A Paloma, Puño Dragón, L.A., Bum Motion Club, Sr./Sr. Jingles, Morgan, Hinds, Begut e DJ90 xa foran confirmados previamente, configurando unha proposta musical ampla e accesible.
Ademais, o festival aposta polo público infantil co MiniSilFest, que este ano reforza a súa oferta coa incorporación de Paco Nogueiras, consolidando o carácter interxeracional da cita.
A organización destaca que o SilFest é "moito máis que concertos". "É pasear por unha contorna privilexiada, montar en kaiak polo río Sil, participar en talleres, descubrir os viños do D.O. Valdeorras, desfrutar dunha Mahou ben fresca, visitar un backstage por primeira vez ou sentarse a comer sen présas mentres os cativos xogan", afirman. A contorna, as actividades compartidas e a calma son elementos clave que buscan converter cada xornada nunha experiencia inesquecible.
Os abonos para o SilFest 2026 xa se atopan á venda a través da páxina web oficial do evento, así como as entradas na tenda Ton y Son do Barco de Valdeorras.
