O centro educativo de Zas recibiu un recoñecemento na segunda edición do concurso #ParqueVibras, unha iniciativa da Consellería de Medio Ambiente e Cambio Climático a través da Dirección Xeral de Patrimonio Natural da Xunta de Galicia. O alumnado de 4º da ESO obtivo o premio á mellor peza audiovisual co traballo O monte Aloia, subliñando o seu compromiso coa conservación do medio ambiente galego.
O certame #ParqueVibras ten como obxectivo achegar os Parques Naturais de Galicia ao alumnado de secundaria, fomentando a súa sensibilización a través da creación de contido para redes sociais como Instagram, TikTok ou YouTube.
Os estudantes de Zas participaron cun vídeo orixinal, integramente en lingua galega, no que se converteron en "influencers" do patrimonio natural para reivindicar a protección dos espazos protexidos. Como recompensa, a clase completa desfrutará dunha excursión a un dos seis parques naturais de Galicia, o que lles permitirá coñecer de primeira man a riqueza biolóxica de enclaves como as Fragas do Eume ou o Monte Aloia.
Ademais, o alumnado de ESO do mesmo instituto tamén gañou un dos Premios Exército 2026 co traballo España: la gran olvidada. Este proxecto estaba relacionado co 250 aniversario da contribución militar española á independencia dos Estados Unidos de América, a efeméride principal desta edición dos premios. Os centros gañadores, incluíndo o CPR La Milagrosa de Lugo e o centro ASPACE Asturias Ángel de la Guarda de Oviedo, concorrerán á fase nacional que se resolverá entre o 11 e o 15 de maio de 2026.
