O Goberno municipal de Zas anunciou a convocatoria de 180 bolsas de axuda ao estudo para o curso 2026/2027. Estas subvencións están dirixidas ao alumnado de Primaria, Secundaria, FP Básica, Bacharelato, Ciclos Formativos e Universidade (agás estudos de posgrao) cuxa unidade familiar estea empadroada no municipio. O seu obxectivo é fomentar a igualdade no acceso á educación e compensar a aquelas familias que, polas súas condicións económicas, presenten maiores dificultades para afrontar os gastos derivados do curso.
Na designación das persoas beneficiarias teranse en conta a situación socioeconómica do núcleo familiar, o número de membros e os méritos académicos. Concederanse bolsas a estudantes repetidores se o contexto económico o xustifica e poderán darse ata dúas subvencións á mesma familia en casos de necesidade urxente.
Esta liña de axudas contará cun investimento total máximo por parte do Concello de Zas de 29.100 euros. Repartiranse 15 bolsas para estudos universitarios (360 euros cada unha), 31 para Bacharelato e Ciclo Superior (180 euros), 68 para ESO, FP Básica e Ciclo Medio (150 euros) e 66 para Primaria (120 euros).
As solicitudes poderanse realizar de xeito presencial nas dependencias municipais ou a través da sede electrónica do Concello dende hoxe, xoves 5 de novembro, ata o martes 17 de novembro.
“"Dende o Concello seguimos comprometidos coa promoción dunha política de benestar social que contribúa a paliar as diferenzas sociais e favorecer a integración no ámbito académico de todos os rapaces e rapazas, independentemente da capacidade económica da súa familia."
