A xerente de Suelo Empresarial del Atlántico (SEA), Beatriz Sestayo Doce, mantivo unha reunión coa alcaldesa de Vimianzo, Mónica Rodríguez Ordóñez, para avanzar no desenvolvemento do parque empresarial municipal. Durante o encontro, abordáronse os próximos pasos administrativos e de comercialización, destacando que no consello de administración de SEA de xuño se formalizarán operacións que consolidan o interese empresarial neste espazo.
Dende o Concello, a rexedora puxo de manifesto a necesidade de mellorar as conexións viarias do polígono, reclamando especificamente a execución do acceso directo dende o corredor de Santa Irene a Calo. Esta infraestrutura é vista como imprescindible para garantir unha comunicación axeitada e segura da área industrial.
A alcaldesa subliñou que a non execución deste enlace xeraría importantes problemas de tráfico no cruce das estradas AC-552 e AC-432, un punto especialmente sensible pola intensidade da circulación e pola futura actividade industrial prevista na zona.
É clave para favorecer a implantación empresarial, mellorar a mobilidade e reforzar a competitividade dun parque empresarial chamado a converterse nun motor económico para Vimianzo e para toda a Costa da Morte.
O Goberno municipal de Vimianzo comprometeuse a seguir traballando con SEA e outras administracións para consolidar este proxecto estratéxico, fundamental para o futuro económico do municipio e da comarca da Costa da Morte.
