A presentación desta iniciativa tivo lugar en Vimianzo, contando coa presenza de Rosa Ana García, deputada de Industria e Emprego da Deputación da Coruña, Mónica Rodríguez, alcaldesa do municipio e tamén deputada provincial, e María Pose, concelleira de Igualdade. O foro, que se desenvolverá os días 8 e 9 de maio, congregará a profesionais de distintas áreas para compartir experiencias e coñecementos sobre o liderado feminino, con especial énfase no contexto rural.
“"É fundamental que as administracións apoiemos iniciativas que visibilicen o talento das mulleres no rural e que contribúan a crear oportunidades reais de desenvolvemento profesional e persoal."
Mónica Rodríguez resaltou a importancia de acoller este tipo de eventos en Vimianzo, subliñando que “contribúen a dinamizar o territorio, a xerar oportunidades e a visibilizar e poñer en primeiro plano o talento e a capacidade das mulleres da Costa da Morte”. Pola súa banda, Rosa Ana García fixo fincapé na necesidade de “tecer redes de colaboración entre institucións e axentes do territorio para fortalecer o papel das mulleres e avanzar cara a unha sociedade máis igualitaria”.
O foro Alza Voz de Muller consolídase como un referente en Galicia para a reflexión, o intercambio de experiencias e a creación de sinerxías no eido do liderado feminino. O programa desta edición está deseñado para xerar un impacto significativo e fomentar a conexión entre profesionais, emprendedoras e axentes sociais. Contará coa participación de destacadas figuras como María Fornet, psicóloga e autora; Yolanda Domínguez, artista visual e consultora; e Laura Sagnier, activista pola equidade, que abordarán temas cruciais para o empoderamento feminino e o impulso de proxectos innovadores no rural.
