A Costa da Morte sufriu unha intensa tormenta de raios na tarde do sábado, que provocou varios incendios forestais nos municipios de Vimianzo, Laxe, Muxía e Zas. Os dous focos máis importantes, situados entre Vimianzo e Laxe, acabaron por unirse, formando un único incendio que, segundo informa a Consellería de Medio Rural, mantense activo pero con evolución favorable.
As últimas estimacións provisionais sitúan a superficie afectada en preto de 165 hectáreas. Nas tarefas de extinción participan de forma conxunta 4 técnicos, 26 axentes, 30 brigadas, 29 motobombas, 5 pas mecánicas, 4 unidades técnicas de apoio, 2 helicópteros e 1 avión.
O primeiro foco detectouse ás 20:16 horas na parroquia de Salto, en Vimianzo, preto da estrada que une Salto e Areosa. Veciños da zona, con cisternas e o apoio posterior de efectivos antiincendios, lograron controlar as chamas. Case ao mesmo tempo, orixinouse outro incendio en Castromil, tamén sofocado por veciños.
Pouco despois das 20:15 horas, unha densa columna de fume anunciou o inicio do que se converteu no principal incendio, na zona limítrofe entre Vimianzo e Laxe. Este foco estendeuse á parroquia laxense de Nande, e ambos os frontes uníronse este domingo. A zona afectada é arbolada e con matogueira, próxima ao Paisaxe Protexido dos Penedos de Pasarela e Traba, que, segundo a alcaldesa de Vimianzo, Mónica Rodríguez, non se viu afectada polo momento.
A orografía escarpada do terreo e a caída da noite dificultaron as labores de extinción, favorecendo a extensión do lume. As chamas eran visibles a medianoite desde puntos como Baio (Zas), Traba (Laxe) ou Salto (Vimianzo).
A tormenta eléctrica tamén causou incendios noutros municipios. En Muxía, efectivos de Protección Civil colaboraron na extinción dun lume preto de Coucieiro, que foi controlado grazas á rápida intervención. En Zas, outro incendio na parroquia de Gándara tamén puido ser sofocado.
Todo apunta a que os lumes, que se produciron case simultaneamente, foron orixinados pola caída de raios, á espera das investigacións pertinentes.
