O lume rexistrado nos concellos coruñeses de Vimianzo e Laxe, que se iniciou o pasado sábado, foi dado por extinguido ás 14.00 horas deste martes. Este incendio, que fusionou os focos das parroquias de Salto (Vimianzo) e Nande (Laxe), afectou unha superficie total de 228,58 hectáreas, das cales 177,8 eran de monte arborado e 50,78 de raso.
Na súa extinción mobilizáronse de forma conxunta un total de 4 técnicos, 56 axentes, 69 brigadas, 62 motobombas, 5 pas, 4 unidades técnicas de apoio, 3 helicópteros e 1 avión.
Por outra banda, o incendio no concello lucense de Ribas de Sil, na parroquia de Soutordei, permanece estabilizado desde as 18.47 horas do luns. Segundo as últimas estimacións provisionais, este lume, que comezou o sábado, afecta unha superficie de arredor de 180 hectáreas.
Este incendio chegou a declarar a Situación 2 como medida preventiva pola súa proximidade ao núcleo de Chenzas, aínda que esta situación operativa foi desactivada na madrugada do domingo. Para a súa extinción mobilizáronse, de xeito acumulado, 8 técnicos, 40 axentes, 58 brigadas, 44 motobombas, 4 pas, 9 helicópteros e 8 avións.
A Consellería do Medio Rural recorda a importancia de alertar sobre calquera incendio forestal chamando ao número gratuíto 085. Tamén se dispón da aplicación móbil ALume para avisos e do teléfono anónimo 900 815 085 para denunciar actividades delituosas incendiarias. A información actualizada sobre incendios de máis de 20 hectáreas está dispoñible en @incendios085.
