A decisión da Xunta de Galicia de autorizar un permiso de investigación mineira de caolín, que afecta aos municipios de Zas, Cabana de Bergantiños e Laxe, xerou unha forte oposición por parte das autoridades locais e da cidadanía. Nunha xuntanza celebrada en Zas, o alcalde, Manuel Muíño, e a Asociación de Veciños A Fonte de Fornelos reuníronse con numerosos veciños para avaliar as posibles consecuencias deste trámite administrativo.

O rexedor sinalou que este permiso é a fase previa a unha futura explotación mineira e recalcou a importancia de mostrar unha oposición "firme, unida e decidida". Muíño lembrou que, aínda que as competencias en minería son estatais, a Xunta de Galicia xestiona os permisos, e o Concello carece de competencias directas neste ámbito. "Os efectos desta futura mina afectarán a todos os veciños de Fornelos dada a proximidade da mesma ao lugar e serán efectos devastadores para o medio e para as persoas", advertiu, comprometéndose a defender os intereses do territorio incluso ante os tribunais se fose necesario.

Segundo as estimacións expostas, a empresa prevé extraer 9.000 toneladas anuais de caolín en Coéns, o que implicaría un movemento de máis de 100.000 toneladas de terra anualmente. Tanto o Concello como a asociación veciñal acordaron actuar de forma coordinada para facer fronte a unha iniciativa que podería ter "importantes repercusións sobre a paisaxe, a actividade económica local, o medio natural e a calidade de vida da poboación".

Como primeira medida de oposición, elaborouse un modelo de recurso de reposición para que a cidadanía poida expresar formalmente a súa oposición ao permiso de investigación. O prazo para a súa presentación remata o vindeiro 30 de xuño. Ademais, informouse de que calquera actuación de investigación mineira en parcelas privadas requirirá a autorización explícita dos propietarios.