O novo centro, que xa leva dous meses operativo, está destinado á atención de persoas maiores dependentes e busca facilitar que permanezan preto da súa contorna familiar e social. Na actualidade, atende a 18 usuarios, maioritariamente de Pantón e municipios próximos.
O acto de inauguración contou coa presenza da conselleira de Política Social e Igualdade, Fabiola García, xunto a representantes institucionais, autoridades locais e responsables da fundación.
Esta iniciativa non só mellora a atención aos maiores, senón que tamén impulsa a economía local, xerando 19 postos de traballo para profesionais da comarca de Pantón e concellos veciños.
“"Esta apertura reforza o noso compromiso coa atención ás persoas maiores no rural galego, achegando servizos esenciais e favorecendo a fixación de poboación."
O presidente da Fundación San Rosendo, José Luis Gavela, destacou o labor da entidade para achegar servizos esenciais ao rural galego e combater o despoboamento.
