O evento, denominado O Encontro Sober, terá lugar no hotel Áurea Palacio os días 7 e 8 de maio. A súa premisa central é superar a narrativa do abandono e da Galicia baleirada, presentando o rural como un espazo de vangarda para resolver os desafíos da sustentabilidade e a nova industria.
“"O rural galego é a solución. É un motor de innovación silenciosa que necesita ser impulsado desde dentro, conectando o talento académico, a coraxe do sector primario e o músculo da gran empresa."
O foro de 2026 abordará 15 temáticas estratéxicas a través de mesas de diálogo. Entre os temas principais figuran a creación de alianzas entre a gran industria e o seu contorno, a garantía da soberanía alimentaria mediante o papel da muller e as novas xeracións, e a transformación da agroindustria e a xestión territorial grazas á dixitalización e a intelixencia de datos.
Entre os 50 relatores confirmados atópanse figuras destacadas como a conselleira do Medio Rural, María José Gómez; o presidente da Confederación de Empresarios de Galicia (CEG), Juan Vieites; e a vicepresidenta primeira do Parlamento de Galicia, Elena Candia. Tamén participarán representantes de grandes grupos corporativos como Hijos de Rivera, Ence, Vegalsa-Eroski, Acciona Energía, Grupo Lence e Cobre San Miguel, ademais de empresas galegas relevantes no ámbito da intelixencia artificial, como Nigal, e os sistemas non tripulados, como Aeromedia.
Como actividade previa ao congreso, o mércores 6 de maio celebrarase un seminario internacional de intelixencia, dirixido exclusivamente á alta dirección. Este seminario será impartido por un exresponsable da CIA en América Latina, quen compartirá metodoloxías de análise de axencias gobernamentais para axudar aos empresarios galegos a anticipar riscos xeopolíticos, protexer activos e tomar decisións estratéxicas nun mercado global. As prazas para este seminario son limitadas e requiren validación da organización.
