Bel, situado na cidade do Cabe, non é só unha óptica convencional. O espazo céntrase na óptica, a optometría e a terapia visual, abordando cada caso de forma personalizada e profunda. A fundadora, Leticia Vila, achega máis de sete anos de experiencia clínica, especializándose en diagnóstico binocular e terapia visual, ademais de ser docente e manterse en continua formación.

O enfoque de Bel vai máis aló da simple corrección con lentes ou lentillas. Vila traballa de maneira integral, colaborando con outros profesionais como logopedas, terapeutas ocupacionais ou fisioterapeutas. "Fago unha avaliación visual profunda, apoiándome en tecnoloxía moi avanzada e co enfoque en visión binocular", explica a optometrista. A partir desta análise, propón tratamentos que poden incluír desde produtos ópticos de calidade e sostibles ata terapia visual ou cambios de hábitos.

A terapia visual é un dos piares do centro, especialmente beneficiosa para nenos e nenas. Aborda dificultades na lectoescritura, estrabismos, ambliopías (ollo vago) sen parche e problemas de rendemento escolar. Non obstante, Bel tamén está orientado a adultos, axudando a mellorar o rendemento laboral, combater a fatiga visual ou tratar a visión dobre, problemas que moitas veces se abordan cando xa son graves pero que obteñen bos resultados coa terapia axeitada.

A filosofía do centro baséase na conexión do corpo: "O corpo é un todo, está conectado e ás veces algo que parece visual non o é e viceversa", detalla Vila, quen non dubida en derivar pacientes a outros especialistas cando é necesario. Bel está deseñado para atender a persoas de todas as idades, dende os cero ata os cen anos, converténdose nun referente para a saúde visual na comarca de Terra de Lemos.