A proba, que conta con 43 pilotos inscritos, percorrerá un total duns 300 quilómetros a través de 19 concellos das provincias da Coruña e Lugo. O evento foi presentado no concello de Guitiriz coa presenza da alcaldesa, Marisol Morandeira, e representantes da escudaría organizadora e entidades colaboradoras.
O rally ofrece a posibilidade de participar no percorrido da mañá, na xornada de tarde ou na completa. A saída da modalidade matinal será dende O Burgo (Culleredo) ás 9:00 horas, con xantar previsto no restaurante La Casilla de Guitiriz para os participantes deste tramo. Pola tarde, os vehículos partirán ás 16:00 horas dende a praza do Campo da Feira de Guitiriz.
A chegada final e a entrega de premios terán lugar no Iberik Gran Balneario de Guitiriz arredor das 21:30 horas. Esta edición está reservada para vehículos clásicos fabricados antes do 31 de decembro de 1995, que deberán cumprir os requisitos técnicos e administrativos establecidos.
O Rally Rías Altas de Regularidade defínese como un evento non deportivo para vehículos históricos que circulan por estradas abertas ao tráfico, cunha velocidade media inferior aos 50 km/h e respectando sempre as normas de circulación vixentes.
