O equipo arqueolóxico que traballou no xacemento dende o 9 de setembro explicará os novos achados e os traballos de restauración realizados durante esta intervención, financiada pola Xunta con 30.000 euros a través dun convenio co Concello de Portomarín.
O xacemento castrexo de Castromaior, situado preto do lugar do mesmo nome na parroquia de Santa María de Castromaior, é un poboado fortificado da Idade do Ferro de gran extensión (máis de catro hectáreas) e complexidade estrutural, con murallas, fosos, unha croa e varios antecastros.
A campaña deste ano centrouse na escavación e restauración de varias zonas que reflicten a pervivencia do castro nos primeiros momentos da ocupación romana, documentando unha vivenda construída sobre a zona de paso da rolda interior e espazos anexos á estrutura tardía fronte á porta de acceso.
Os datos achegan información sobre as transformacións do poboado ao redor do cambio de era e a influencia dos cambios sociais e económicos coa chegada de Roma. Logo da escavación, realizáronse traballos de restauración e conservación para a súa exhibición ao público, sendo un asentamento concorrido por visitantes, especialmente polo seu emprazamento nas inmediacións do Camiño Francés.
O xacemento foi escavado parcialmente entre 2006 e 2009, e consolidado entre 2020 e 2021. Nos anos 2023 e 2024 emprendéronse dúas campañas de escavación e consolidación centradas no tramo interior do sector leste da muralla.
