A iniciativa de Xabi Paz xorde da necesidade de cubrir a falta de servizos para cabalos que chegan á súa etapa de xubilación ou que están en fase de recría. Moitos afeccionados á hípica carecen de espazos axeitados para manter os seus animais unha vez finalizada a súa vida útil nas pistas ou a tempada de competición.
“"A idea do refuxio xurdiu pola falta de servizos que hai para os cabalos, unha vez que chega o momento da súa xubilación, pero tamén na recría."
Paz, quen posúe unha ampla experiencia no mundo ecuestre dende a súa infancia, participando en probas nacionais e internacionais, asegura que as condicións do refuxio en Goiriz son idóneas. As fincas, tradicionalmente empregadas para gando vacún, ofrecen un entorno natural e seguro para os equinos, cun clima favorable sen nevadas extremas.
Os propietarios dos cabalos poderán elixir entre diferentes modalidades de estancia, dende a liberdade en pasteiros xunto a outros animais ata a opción de cuadras privadas. Todos os equinos recibirán unha alimentación adaptada ás súas necesidades e contarán con vixilancia veterinaria constante, priorizando o seu benestar e tranquilidade.
“"Queremos que os animais podan desfrutar nas mellores condicións do seu merecido retiro."
Este proxecto forma parte da firma Equestrian Services, dedicada ao comercio e preparación de cabalos de competición. Engádese a un ecosistema empresarial que Xabi Paz iniciou en 2017 coa explotación gandeira, e que se expandiu coa apertura do local de hostalería Pizzca en Vilalba, e Peso Pluma en Lugo a principios de 2025, ademais da adquisición dunha administración de lotería en Mos, Pontevedra, a finais do mesmo ano.
