O rexedor de Muras, Manuel Requeixo, demandou un maior esforzo por parte das administracións estatal e galega para actualizar a información catastral e clarificar situacións de propiedades sen titular. Segundo explicou, estas circunstancias "lastran a xestión e o aproveitamento do territorio en zonas rurais".
Requeixo expuxo esta necesidade durante unha xornada organizada dentro do proxecto de cooperación europeo "Clarificación da propiedade. Unha herdanza para futuras xeracións", impulsado por grupos de desenvolvemento rural de Asturias e de Galicia como Oscos Eo e Montes e Vales Orientais.
Na xornada, celebrada no Parador de Corias, en Cangas del Narcea, o alcalde valorou a participación de Muras no proxecto "A Finca", promovido polo Ministerio de Hacienda. Esta iniciativa, desenvolvida en 2022, pretendía facilitar a actualización de datos catastrais e a inscrición de propiedades no Rexistro de particulares.
O concello chairego foi seleccionado para esta iniciativa xunto a outros 22 municipios do Estado con alto índice de despoboamento. "Fixéronse xestións con proba documental, pero non houbo un traballo de campo polo que non se percibiu unha mellora significativa", indicou o rexedor. Engadiu que a falta de clarificación da propiedade segue sendo un problema tanto para operacións entre particulares como para procedementos que implican a concellos, como a devolución a propietarios dos montes conveniados.
Requeixo incidiu na necesidade de "un traballo de campo sistemático" por parte das administracións estatal e autonómica. Sinalou que esta é a única maneira de corrixir unha situación que, ao seu xuízo, "só beneficia a grandes corporacións como as enerxéticas que teñen capacidade técnica e económica para superar obstáculos, que son insalvables para persoas particulares e administracións locais".
