Co inicio do novo curso, o Concello de Valdoviño anuncia a reapertura do prazo para que os veciños e veciñas poidan solicitar o uso do ximnasio municipal. Ademais, flexibilízanse os horarios das quendas, cada unha dunha hora de duración, para facilitar o acceso á instalación.
A partir de agora e ata o mes de xuño, o ximnasio estará dispoñible as mañás dos luns, mércores e venres, en horario de 10:00 a 12:00 horas. Polas tardes, o espazo poderá utilizarse de luns a venres, entre as 19:00 e as 22:00 horas. A Concellería de Deportes sinalou que os horarios poderán ser modificados se os grupos non están completos, segundo o criterio do técnico de área.
O custo da utilización das instalacións municipais é de 16 euros ao mes para aqueles usuarios que empreguen o ximnasio dúas horas á semana, e de 24 euros mensuais para quen o utilice tres horas semanais.
O ximnasio municipal, inaugurado hai un ano no pavillón O Longoiro, en Meirás, conta con maquinaria de uso básico. O Concello tamén ofrece asesoramento personalizado aos veciños que o soliciten, proporcionando táboas de exercicios adaptadas á súa condición física e obxectivos.
A instalación está aberta a maiores de 16 anos. Os menores de idade deberán presentar unha autorización asinada polo pai, nai ou titor legal. A solicitude debe tramitarse presencialmente no rexistro do Concello ou a través da súa sede electrónica.
