A formación popular de Guitiriz fixo público o recurso de reforma presentado ante o arquivo, por parte do Tribunal de Instancia de Vilalba, das actuacións contra a rexedora. O PP considera esta decisión "precipitada", argumentando que non se tivo en conta a ampliación da denuncia inicial, que incluía un segundo cobro de dietas relacionado cunha viaxe a Girona. Os populares xa anunciaron que, de non ser estimado este recurso, presentarán un recurso de apelación subsidiario ante a Audiencia Provincial.
“"Aínda están pendentes as investigacións solicitadas previamente para verificar a participación telemática, a autenticidade e integridade da acta e a existencia da trazabilidade da sesión."
O portavoz popular en Guitiriz, José Manuel López, defende que o seu partido actúa "conforme ao que marca a lei", ao poñer en coñecemento da xustiza os indicios dun presunto delito para salvagardar os intereses dos veciños. Os populares solicitaran, antes de coñecer o auto de arquivo, as actas electrónicas orixinais ou o ficheiro dixital coa gravación das sesións das xuntas de goberno local do 10 de decembro de 2025 e do 4 de febreiro de 2026, datas que coincidían con viaxes a Portugal e Girona, respectivamente. Tamén pediron os expedientes completos e a preservación de evidencias dixitais.
López subliña que, aínda que o Regulamento Orgánico Municipal contemple a posibilidade de sesións telemáticas, isto non acredita que se realizasen, de aí a necesidade de "probas tanxibles". Insiste en que, para a validez da participación en órganos colexiados, o asistente debe estar en territorio español e que as sesións a distancia "deberán ser gravadas" para certificar a participación telemática.
O PP tamén cuestiona a "validez legal" do cobro das dietas e a cantidade percibida pola alcaldesa, que ascende a 381,65 euros. Desta cantidade, 114,09 euros corresponden a aloxamento e 51,09 euros a manutención. Segundo o auto, o abono sería acorde ao acordo plenario que establece o réxime de retribución e indemnizacións dos membros da corporación. Con todo, López destaca que esta cantidade é superior ao custo da viaxe, organizada por unha asociación privada entre o 9 e o 11 de decembro de 2025, cuxo custo máximo era de 310 euros con pensión completa e habitación individual.
