A capital chairega acolleu este xoves a un grupo de 20 alumnos de sexto de primaria da Escola Básica de Canedo, procedentes da localidade lusa de Santa María de Feira. Esta visita forma parte do programa de intercambios educativos promovido polo Eixo Atlántico, que busca fomentar a relación entre os estudantes da eurorrexión.

Os anfitrións desta edición son os alumnos do CEIP Terra Chá de Román, cos que os estudantes portugueses compartirán dúas xornadas cheas de actividades. Nun futuro próximo, serán os escolares de Vilalba os que viaxarán a Portugal para completar o intercambio.

Durante a primeira xornada, os visitantes foron recibidos no Concello pola alcaldesa, Marta Rouco. Posteriormente, tiveron a oportunidade de coñecer a quesería Don Crisanto para aprender sobre o queixo San Simón e participaron nun escape room na Praza de Santa María e na Torre dos Andrade, unha experiencia centrada na historia e curiosidades de Vilalba.

Para este venres, a axenda inclúe unha visita ao paseo fluvial e á área recreativa de A Magdalena, onde realizarán unha xincana de actividades. A despedida antes do regreso a Portugal estará amenizada pola actuación do mago Roberto Lolo.

Esta é a segunda ocasión na que Vilalba participa neste programa de intercambios escolares. A localidade, que formalizou a súa entrada no Eixo Atlántico en febreiro de 2025, xa tivo unha experiencia similar o curso pasado con alumnado de Guimarães, en colaboración co CEIP Insua Bermúdez.