O director de Administración e Relacións coas Asociacións de Amigos do Camiño do Plan Xacobeo, Ildefonso de la Campa, e o delegado territorial da Xunta en Lugo, Alfonso Villares, presentaron en Mondoñedo a iniciativa ‘O son das campás no Camiño’. O proxecto, financiado polo Goberno galego, busca fomentar o asociacionismo e a participación local, convertendo o patrimonio sonoro nun novo atractivo para os peregrinos do Camiño do Norte.
A proposta recupera o significado histórico das campás como elemento protector e de encontro cultural, combinando patrimonio, música, tradición e espiritualidade. Estrutúrase en tres ámbitos: ‘Paula e o Peregrino’, que inclúe toques manuais antes da Misa do Peregrino na Santa Igrexa Catedral Basílica de Mondoñedo; ‘A conversa das campás’, con toques rotatorios en distintas igrexas que responden á Catedral; e ‘O Son das Campás no Camiño’, un concerto anual que congrega os campanarios da cidade.
A actividade ‘Paula e o Peregrino’ desenvolverase tres días á semana durante o período do proxecto, media hora antes da Misa do Peregrino (20.00 horas), cunha duración duns 15 minutos. A iniciativa ‘De Catedral a Catedral’ busca pór en valor o patrimonio material e inmaterial de Mondoñedo, permitindo que cinco peregrinos participen no toque manual da campá ‘A Paula’, un dos símbolos sonoros da cidade cun peso de máis de 1.300 quilos e que mantén o seu toque manual tradicional.
A segunda actividade, ‘A conversa das campás’, terá lugar dúas veces ao mes, con toques manuais rotatorios das campás das distintas igrexas de Mondoñedo, ás que responderán as da Catedral. Finalmente, celebrarase anualmente ‘O Son das Campás no Camiño’, un concerto que reunirá os campanarios da cidade, con especial protagonismo para o da Santa Igrexa Catedral Basílica.
A Asociación O Camiño Norte. De Catedral a Catedral, integrada por tecido empresarial de Mondoñedo, promove o Camiño do Norte e a relevancia histórica e cultural da localidade. A Xunta de Galicia financiou o proxecto cun investimento de 300.000 euros, dentro das axudas ás asociacións de amigos do Camiño de Santiago.
