As ofertas para o equipamento da lavandería e cociña da residencia de maiores chegaron esta semana, e o Concello prevé contratar "canto antes" para iniciar os traballos. Esta actuación conta cun orzamento de 146.361,60 euros e financiarase cunha partida do plan único da Diputación de Lugo.
Ademais, está pendente a contratación da pavimentación da rúa de acceso á residencia desde a N-634. O orzamento para esta obra é similar, 146.126,03 euros, e será financiado con fondos da Xunta de Galicia.
O alcalde, José María López Rancaño, sinalou que só resta rematar as beirarrúas do centro cun contrato menor e buscar financiamento para o mobiliario, estimado nuns 200.000 euros, ou facelo con fondos propios. Xa se solicitaron axudas á Presidencia e a Benestar Social.
“"Este ano abrirá seguro a residencia"
A xestión do centro será público-privada. Aínda que o inmoble é municipal e a idea é que a dirección sexa do Concello, a administración local non dispón da capacidade para asumir todo o funcionamento. O obxectivo é abaratar as prazas cubrindo servizos como o subministro de auga ou a recollida de lixos, e poder subvencionar algunha praza para persoas con menos recursos.
A residencia ofertará un total de 44 prazas, un servizo moi demandado nun municipio onde o 60% dos veciños teñen máis de 65 anos. Segundo os últimos datos do Ige, Abadín rexistra 2.238 habitantes, dos cales 898 superan esa idade.
