O humedal da Lagoa de Cospeito, recoñecido pola súa singularidade natural, histórica e lendaria, é un dos principais atractivos turísticos da Terra Chá. Conscientes do seu valor, as administracións impulsaron ao longo das últimas dúas décadas un ambicioso plan para converter o núcleo da Feira do Monte nun gran centro de interpretación ao aire libre, utilizando a lagoa como eixo central.
Hai vinte anos, o primeiro obxectivo foi dar a coñecer e sinalizar a lagoa. Executouse unha senda peonil de case dous quilómetros que conecta o humedal co Mirador da Terra Chá. Ao longo deste percorrido, unha vintena de paneis informativos achegan datos sobre o espazo. Tamén se reformou a Praza Maior, onde se instalou unha fonte coa escultura Lagoa, de Rafael Nadales, unha alegoría do entorno natural. Este proxecto, inaugurado en 2007, incluíu tamén a dotación de aparcadoiro e espazo para autocaravanas preto do centro de interpretación.
Dez anos despois, en 2017, xurdiron dúas novas sendas peonís para unir puntos de interese. Unha ruta circular de catro quilómetros bordea o casco urbano da Feira do Monte e parte da lagoa, recuperando e acondicionando cinco fontes emblemáticas: Fonte da Virxe, Fonte da Lagoa, e as fontes de San Paio, Felín e Ramalleira. Paralelamente, creouse outro percorrido que une o centro de interpretación coa Casa das Aves, un museo ornitolóxico situado no antigo cuartel da Garda Civil. Tras un período de apertura intermitente, este espazo foi recentemente posto a punto e conta cunha técnica de turismo para a súa xestión.
Ademais destas actuacións de conexión de recursos, a Lagoa de Cospeito foi obxecto dunha recente e importante restauración ecolóxica, finalizada en 2023. O proxecto, cun investimento de case 450.000 euros da Xunta, incrementou a lámina natural de auga en 2,5 hectáreas, sumando case 17 hectáreas totais. Incluíuse a recuperación do corredor fluvial do río Guisande, o control de especies exóticas e a mellora de hábitats protexidos. Recentemente, anunciouse unha nova inversión de medio millón de euros para continuar aumentando a superficie de auga, co proxecto previsto para este ano e as obras para 2027.
A aposta polo valor natural complétase cunha gran intervención no extremo oposto da Feira do Monte: a recuperación de case 40.000 metros cadrados de montes comunais para crear un parque periurbano. Iniciado en 2018, este proxecto inclúe sendas, parque biosaludable, aparcadoiro, paneis informativos, plantación de árbores e zona de xogos tradicionais. A urbanización da Rúa Curros Enríquez e o acondicionamento do recinto feiral completan a transformación urbanística da localidade, que coida a súa lagoa para futuras xeracións.
