A Praza da Constitución encheuse de xente para gozar dunha edición moi concorrida da Festa do Salmón. O exbaloncestista Fernando Romay Pereiro foi o encargado de dar lectura ao pregón, combinando humor e eloxios ao traballo dos restauradores locais. No acto institucional, tamén estiveron presentes o alcalde, Gonzalo Louzao, e o conselleiro de Educación, Román Rodríguez.

Durante a xornada, entregáronse os galardóns Salmón de Ouro. Fernando Romay recibiu a súa distinción de mans do conselleiro Román Rodríguez e do alcalde Gonzalo Louzao. Tamén foi homenaxeada a exalcaldesa Elvira Fernández Díaz, cuxa filla pronunciou un emotivo discurso lembrando as súas raíces no municipio. Outros recoñecidos foron o actor e músico Darío Loureiro Carbia e a creadora audiovisual Ariadna Silva Fernández, quen tamén defendeu a importancia da conservación do río Ulla.

A Academia Galega de Seguridade Pública (Agasp) tamén recibiu unha insignia, representada polo seu director xeral de Emerxencias, Santiago Villanueva, en recoñecemento á súa labor formativa e arraigo na localidade.

O alcalde Gonzalo Louzao destacou o crecemento da festa, a implicación do sector da hostalaría e o valor simbólico do salmón e do río Ulla. Non obstante, tamén expresou a súa preocupación polo delicado momento que atravesa a pesca do salmón, subliñando o papel da Sociedade Deportiva Río Ulla como "a primeira defensora do río".

A celebración, que coincidiu co Día das Letras Galegas, contou coa actuación da Coral Polifónica Estradense. A degustación popular estivo amenizada pola Big Band Carlos Barruso e a participación de 18 establecementos hostaleiros. A verbena de clausura correu a cargo da orquestra París de Noia.

Ademais, a Fundación Artesanía de Galicia estivo presente coa xerente Elena Fabeiro e trece obradoiros especializados en diversos oficios artesanais, como marroquinería, bisutería, instrumentos musicais, téxtil e bonecas.