O Goberno autonómico deu luz verde á incorporación de tres novas celebracións ao catálogo de festas de interese turístico de Galicia. Trátase da Romaría de Santa Minia, en Brión; a Festa da Ameixa de Campelo, en Poio; e a Noite Meiga de Sarria. O presidente galego, Alfonso Rueda, destacou que este recoñecemento valora a antigüidade, singularidade, impacto cultural e arraigo destas festas na comunidade.

A Romaría de Santa Minia, que se celebra en Brión o 27 de setembro, ten a súa orixe no ano 1848. Ademais dos actos relixiosos, a festa inclúe manifestacións culturais como actuacións musicais e oferta gastronómica, complementada cunha programación socioculturais.

En Poio, a Festa da Ameixa de Campelo conmemórase dende 1988. Esta celebración é un elemento clave da identidade desta vila mariñeira, cuxa tradición marisqueira se remonta a máis de 2.500 anos, á época castrexa.

Pola súa banda, a Noite Meiga de Sarria organízase dende 1969 o último sábado de agosto pola asociación Meigas e Trasgos. O evento conmemora o remate do verán e ten como momento central a danza da Noite Meiga, unha coreografía creada por Carmela González Ruiz inspirada nunha lenda popular.