Os feitos foron descubertos na mañá do día 8, cando os operarios municipais se dispoñían a comezar a súa xornada laboral. A principal hipótese é que a subtracción se producise durante a noite. Ao chegar ao inmoble, atoparon o bombín da fechadura da porta peonil de acceso forzado, probablemente cun obxecto contundente, segundo consta na denuncia. Ademais, o cadeado dunha porta de ferro interior tamén apareceu danado.
Entre os obxectos subtraídos atópanse tres motoserras, dúas radiais con dúas baterías cada unha e un cargador. Tamén se levaron unha batería dunha ferramenta, un cargador dunha furadeira e oito queixos, entre outros artigos. O valor total do material roubado foi estimado polo Concello en aproximadamente 1.900 euros, aos que hai que sumar uns 100 euros máis pola reparación do bombín da fechadura danificada.
Intentaron acceder a vivendas da Pobra, pero non o conseguiron.
O alcalde, Darío Piñeiro, sinalou que teñen constancia de que tamén houbo intentos de roubo nalgúns domicilios da localidade, aínda que os autores non lograron acceder. Segundo as súas declaracións, nestes casos non se presentaron denuncias formais. Esta situación xerou preocupación entre os veciños, xa que en decembro de 2025 e xaneiro deste ano xa se produciran asaltos a dúas vivendas unifamiliares na mesma localidade, onde os ladróns subtraeron diñeiro e xoias.
