A Praza da Vila de Sarria será o punto central da trixésima terceira edición do Descenso Urbano, concentrando non só a meta da competición senón tamén todos os eventos musicais, o dirt jump e a zona de podio. Esta decisión, tomada a última hora, busca centralizar o evento nun único espazo e renovar o circuíto, aínda que se perdan puntos emblemáticos como a baixada da escalinata ou o salto á illa do Don Pepe.
A pesar dos cambios, a organización DHGTeam asegura que a espectacularidade do descenso, considerado un dos máis chamativos a nivel nacional, manterase grazas a novos saltos e obstáculos deseñados para os ciclistas.
O programa comeza este sábado co Mini DHU, cuxos adestramentos inician ás 9.30h, seguidos da manga clasificatoria ás 11.45h e a final ás 12.30h. Pola tarde, os adultos terán o seu primeiro contacto co descenso ás 16.00h, mentres que o Dirt Jump arrincará ás 19.00h.
A xornada do sábado estará marcada pola música, coa actuación da batukada Tukupá! ás 18.00h e Big Motion ás 21.20h. Os concertos comezarán ás 21.45h con Habló Pablo, seguido de Mescalina ás 23.00h e Señora Dj á 1.00h.
O domingo, os adestramentos comezarán ás 10.00h, coa clasificación ás 16.00h e a manga final do DHU ás 17.30h.
Os cortes de tráfico durante a fin de semana veranse reducidos grazas á nova distribución do circuíto. O Concello de Sarria pechará totalmente a Rúa Conde de Lemos, a Rúa Maior e a Rúa Marqués de Ugena. Ademais, a Rúa Rosalía de Castro terá un sentido de circulación contrario ao habitual dende o venres ás 15.30h ata o domingo.
