O certame, que conta coa colaboración da Xunta de Galicia, a Fundación Rosalía de Castro e El Corte Inglés, pretende achegar a figura de Rosalía de Castro ás xeracións máis novas e impulsar a escrita na lingua galega.
García destacou que se trata dun "certame xa consolidado ao que nos sumamos para reforzar a implicación da comunidade educativa nunha iniciativa que impulsa o talento literario e a escrita na nosa lingua". Engadiu a importancia de "xerar propostas de interese ao redor do galego que motiven á mocidade no contexto dos centros de ensino".
A convocatoria está aberta ao alumnado do curso 2026-2027 e divídese en tres categorías: terceiro ciclo de Primaria (5º e 6º curso), primeiro ciclo de Secundaria (1º e 2º curso) e segundo ciclo de Secundaria (3º e 4º curso). Os traballos, que deben ser orixinais e estar escritos en lingua galega, poderán remitirse ata o 15 de xaneiro de 2027.
Os orixinais poden entregarse nos departamentos de Comunicación de calquera dos centros de El Corte Inglés en Galicia ou persoalmente nas súas librarías. As bases da convocatoria, que inclúen premios en tarxetas agasallo, están dispoñibles nas páxinas web da Fundación Rosalía de Castro e de El Corte Inglés.
