A Dirección Xeral de Recursos Humanos do Servizo Galego de Saúde deu publicidade ao lugar, data e hora da realización dos exercicios da fase de oposición para o acceso a diversas categorías do sistema sanitario público galego. Os exames comezarán o vindeiro sábado 24 de outubro ás 9,30 horas.
Nese primeiro horario, están citados 1.961 aspirantes para as categorías de técnico en farmacia (1.273 admitidos para 38 prazas), logopedista (219 aspirantes para 5 prazas) e condutor (469 persoas para 15 prazas). Na quenda de tarde dese mesmo día, desde as 16,00 horas, terán lugar as probas para fisioterapeuta (870 admitidos para 27 prazas), técnico superior en imaxe para o diagnóstico (1.406 admitidos para 67 prazas), fontaneiro (156 aspirantes para 8 prazas) e técnico especialista en sistemas e tecnoloxías da información (140 admitidos para 5 prazas). Estes exercicios rexistraron un total de 2.572 persoas admitidas.
O domingo 25 de outubro, desde as 16,00 horas, celebraranse os exames para técnico en coidados auxiliares de enfermería (TCAE), tanto na quenda xeral como na de discapacidade intelectual, e para técnico/a en farmacia (quenda de discapacidade intelectual). Neste caso, foron admitidas un total de 9.561 persoas, das cales 9.555 optan ás 1.306 prazas de TCAE e 6 aspirantes á categoría de técnico de farmacia (discapacidade intelectual).
As probas continuarán o domingo 8 de novembro, desde as 9,30 horas, con 1.496 opositores convocados. Inclúen médico de admisión e documentación clínica (56 aspirantes para 5 prazas), técnico superior en sistemas e tecnoloxías da información (91 admitidos para 9 prazas), traballador social (1.608 opositores para 57 prazas) e mecánico (277 aspirantes para 5 prazas). Na quenda de tarde dese día, 8.003 persoas participarán nas probas para o grupo auxiliar da función administrativa (192 prazas ofertadas).
A fin de semana do 14 e 15 de novembro será a última con exames, á que están chamadas 10.172 persoas. O sábado 14 pola mañá (9,30h) haberá probas para médico xeral de Axencia de Doazón de Órganos e Sangue (34 aspirantes para 6 prazas), farmacéuticos de atención primaria (655 admitidos para 31 prazas), odontólogos de atención primaria (196 admitidos para 8 prazas), técnico en xestión en sistemas e tecnoloxías da información (104 aspirantes para 9 prazas) e calefactor (181 admitidos para 7 prazas). Pola tarde (16,00h), realizaranse as probas para celador (7.800 persoas para 348 prazas).
O domingo 15 de novembro concluirán os exames (9,30h) coas especialidades de médico asistencial do 061 (139 admitidos para 8 prazas), terapeuta ocupacional (273 admitidos para 11 prazas), dietista-nutricionista (363 admitidos para 45 prazas) e electricista (427 admitidos para 11 prazas).
