A investigación, liderada polo Oral Sciences Research Group (OSRG) da USC, busca avanzar cara a novas ferramentas de detección da periodontite, unha enfermidade inflamatoria crónica que afecta a máis de 1.000 millóns de persoas no mundo. O estudo contou coa participación da catedrática da USC e investigadora do Centro Singular de Investigación en Tecnoloxías Intelixentes da USC (CiTIUS) María José Carreira e a investigadora Manuela Alonso-Sampedro do IDIS.
O traballo analizou 2.303 mostras da cavidade oral (saliva, placa dental e placa subxinxival) de 33 bioproxectos. Mediante técnicas de intelixencia artificial, o equipo buscou combinacións de bacterias capaces de diferenciar entre persoas con periodontite e aquelas con saúde periodontal. Os resultados indican que a saliva é a mostra con maior potencial diagnóstico, acadando unha sensibilidade do 92,4% e unha especificidade do 85,3%.
A profesora Inmaculada Tomás, investigadora principal, sinala que "non necesitamos necesariamente acceder ao interior da bolsa periodontal para obter información diagnóstica moi potente". A saliva integra sinais microbiolóxicos de toda a cavidade oral, e a súa pegada microbiana, interpretada mediante intelixencia artificial, permite discriminar con alta precisión entre saúde e periodontite.
O estudo tamén avaliou a posible utilidade dos modelos na toma de decisións clínicas, identificando 48 variantes bacterianas con valor preditivo, incluíndo microorganismos como Porphyromonas gingivalis e Tannerella forsythia.
O obxectivo a longo prazo é avanzar cara a unha "periodoncia de precisión" onde unha mostra de saliva axude a identificar precocemente persoas con maior probabilidade de enfermidade. Este traballo proporciona unha base científica para o desenvolvemento de ferramentas de cribado accesibles, non invasivas e escalables.
Os resultados, publicados no Journal of Dental Research baixo o título ‘Comparative Diagnostic Performance of Oral Hábitats for Periodontitis’, contaron co financiamento do Instituto de Saúde Carlos III, a Xunta de Galicia e Nova Galimplant S.L.U.
