O acto, que tivo lugar na sala de prensa do Pazo de Montenegro do Campus de Lugo, contou coa participación da reitora Rosa M. Crujeiras e da presidenta de Aresa, Carlota López Pardo. O premio distingue o traballo de empresas, asociacións, entidades e grupos de investigación comprometidos co desenvolvemento do medio rural galego.
O obxectivo do Premio Aresa é recoñecer proxectos que impulsen a actividade económica, creen emprego e melloren a calidade de vida no rural. Valoraranse aspectos como a viabilidade económica, a xeración de valor engadido, a recuperación de actividades agrícolas e gandeiras, o aproveitamento de produtos tradicionais e a incorporación de innovacións.
“"Desde a Universidade de Santiago de Compostela entendemos que a investigación e a innovación deben estar conectadas cos retos e coas necesidades do noso territorio. E o medio rural é, sen dúbida, un ámbito no que temos moito que achegar, tanto desde a investigación como desde a transferencia de coñecemento e a colaboración co tecido produtivo."
A reitora, acompañada polo vicerreitor de Coordinación do Campus de Lugo, Roberto Bande, destacou que o premio "ten precisamente ese valor: dar visibilidade a proxectos innovadores, a iniciativas empresariais e a traballos de I+D+i que contribúen a modernizar os sectores agrícola, gandeiro e agroalimentario, e que demostran que no rural tamén hai capacidade para emprender, innovar e crear futuro".
Coa sinatura deste acordo, ábrese o prazo de presentación de candidaturas, que poderán presentarse desde este martes 4 ata o 18 de decembro. As bases completas do certame están dispoñibles en aresa-agricola.com.
Ao longo das súas vinte e seis edicións anteriores, o Premio Aresa recoñeceu diversas iniciativas vinculadas ao sector primario, á investigación e á transformación agroalimentaria. Entre os galardoados figuran Novafrigsa (2000), Javier Guitián Rivera (2001), a IXP Ternera Gallega (2004), a DO Ribeira Sacra (2006), Ingapan (2009), Alibós Galicia (2013), Craega (2018), Asoporcel (2019), Cooperativa A Carqueixa (2020), Casa Grande de Xanceda (2022), Moexmu (2023), Traloagro (2024) e Bico de Xeado (2025).
