A directora xeral de Promoción da Igualdade, Paula Uría, resaltou que o avance cara á igualdade pasa por conseguir que o talento feminino chegue ao liderado. Uría participou no II Congreso Executivas de Galicia Mulleres que abren camiño, celebrado en Santiago de Compostela o pasado 17 de novembro.
A responsable subliñou que o éxito das mulleres que abren camiño non é ser as primeiras, senón conseguir que despois delas veñan moitas máis. "O verdadeiro éxito das mulleres que abren camiño non é ser as primeiras -explicou- é conseguir que despois delas veñan moitas máis".
Paula Uría considerou especialmente valioso que no congreso convivan mulleres con traxectorias consolidadas con executivas junior e novas xeracións de profesionais, remarcando a importancia de que o talento feminino estea presente desde o principio nas transformacións do mercado laboral.
No marco da celebración deste congreso, tamén participaron na sesión Executivas Junior a directora xeral de Xuventude, Lara Meneses, e a clausura correu a cargo da directora xeral de Traballo Autónomo e Economía Social, Marta Vázquez.




