O conselleiro de Medio Ambiente e Cambio Climático, Nicolás Vázquez Iglesias, mantivo hoxe unha reunión co alcalde de Boqueixón, Ovidio Rodeiro, na que abordaron cuestións de interese municipal en materia de augas.
O rexedor referiuse especificamente ao estudo municipal realizado co fin de mellorar o sistema de saneamento en pequenos núcleos do concello. Este proxecto xa foi remitido a Augas de Galicia para a súa supervisión técnica.
Aínda que as competencias en materia de saneamento, depuración e abastecemento de augas son municipais, a Xunta, a través da Consellería de Medio Ambiente e Cambio Climático, presta apoio técnico e económico aos concellos, especialmente aos máis pequenos, para que poidan exercer estas funcións de xeito eficiente e prestar servizos de calidade.




