O festival Cineuropa, na súa 40ª edición, outorgou o galardón á intérprete nunha cerimonia celebrada no Teatro Principal. O acto contou coas intervencións da concelleira de Capital Cultural, Míriam Louzao, do director do festival, José Luis Losa, e da propia actriz, recoñecendo a súa traxectoria marcada polo rigor interpretativo e a sensibilidade.
Na súa intervención, Míriam Louzao destacou a contribución de Marull a un cinema comprometido coa realidade social e a representación de personaxes femininas complexas, cualificando a súa interpretación como un exercicio de verdade e compromiso. Tamén vinculou a traxectoria da intérprete coa vocación cultural de Cineuropa, que este ano celebra catro décadas baixo o lema 'Corenta anos movendo a nosa maneira de mirar'.
José Luis Losa realizou un percorrido pola carreira da actriz, desde os seus primeiros traballos teatrais ata as súas interpretacións máis recentes, definíndoa como unha 'actriz en estado de plenitude' e agradecendo os seus 'tantos pasos creativos cara adiante'.
“"Ao longo da miña carreira procurei escoller proxectos que me emocionasen e me permitisen continuar aprendendo, e destacou a satisfacción de contribuír, a través do meu traballo, a esa experiencia transformadora que pode provocar o cinema."
Ao recoller o galardón, Laia Marull agradeceu o recoñecemento e reflexionou sobre o sentido da súa profesión, defendendo o valor da cultura fronte aos discursos que a presentan como adoutrinamento. 'A cultura é coñecemento, é saber', afirmou, evocando a Federico García Lorca. Tamén tivo palabras de agradecemento para a súa nai por fomentar a súa curiosidade.
A homenaxe completouse coa proxección de La terra negra, o último traballo de Alberto Morais, protagonizado por Marull xunto a Sergi López. O filme supón unha nova colaboración entre a actriz e o cineasta valenciano.
